Ukraina haber siyaseti nazirligi ve Tavriya gumanitar platformasınıñ koordinatorı Andriy İvanets Lvivde keçirilgen 25-inci kitap forumı çerçivesinde «Birinci Qurultay» kitabını taqdim ettiler.
Bunı sentâbrniñ 22-nde Ukraina haber siyaseti naziriniñ birinci muavini Emine Ceppar Facebookta yazdı.
«Qırımtatarlarnıñ idare organı yüksek siyasiy medeniyet timsalı olıp qala. Söz sırası, qadınlarnıñ da milliy parlamentke saylanmaq aqqı bar edi, o vaqıtları musulman halqlarında ve şimdiki demokratiyalarnıñ çoqusında böyle bir şey yoq edi», – dep yazdı Ceppar.
Daa evel haber etilgeni kibi, Tavriya gumanitar platformasınıñ koordinatorı, Ukrainaşınaslıq ilmiy-tedqiqat institutınıñ üyken hadimi Andriy İvanetsniñ Birinci milliy qırımtatar Qurultayına bağışlanğan monografiyası «2018 senesiniñ kitabı» ilk yarım yılınıñ reytingindeki eñ güzel 7 kitap sırasına kirdi.
2017 senesi dekabr ayında Qırımtatar Milliy Meclisiniñ reisi Refat Çubarov, qırımtatarlarnıñ temsil organı qırımtatar müellifleriniñ yigirmi kitabını ukraincege tercime etip bastırmağa qarar bergenini bildirgen edi.
2017 senesi dekabrniñ 18-nde Kyivdeki «Qırım evi» merkezinde Yunus Qandımnıñ qaleminden çıqqan «Küreş meydanını ot basmaz…» kitabınıñ ukraince tercimesi taqdim etilgen edi. İşbu kitap 1917 senesi qırımtatarlarnıñ milliy ve diniy lideri Noman Çelebicihan aqqında tarif ete.
2017 senesi dekabrniñ 6-nda Ukraina Yuqarı Radasında Birinci Qırımtatar Milliy Qurultayınıñ 100 yılına bağışlanğan tantanalı oturışuvı olıp keçti. Ukraina haber siyaseti nazirligi, Qurultay ne olğanını ve qırımtatar milliy areketindeki tarihiy emiyetini añlatmaq içün media kampaniyasını başlatqan edi.
Qırımtatar Milliy Qurultayı – qırımtatar halqınıñ yüksek temsiliy vekâletli organıdır.
1917 senesi dekabr ayında Qırımtatar Milliy Qurultayı mavı tüsli milliy bayraqnı, milliy tamğanı ve milliy gimnni tasdıqlağan edi.
