Ukraina İç işler naziriniñ mesleatçısı Anton Geraşçenko, saba Lvivde patlav sesleri eşitilgenini bildirdi. Lviv şeer başı Andriy Sadovoy, Rusiye raketelarnen darbe endirgenini qayd etti.
"Lvivde saba saat 6:30-ta patlav sesleri eşitildi, şeerniñ kenarında yanğın körüne", - dep yazdı o Telegramda.
Sadovoy, Rusiye raketaları uçaqlar tamiri zavudına darbe endirgenini qayd etti.
"Endirilgen darbelerden sebep binaları yoq etildi. Zavodnıñ faal işi evelden toqtatılğanı içün şimdilik ölgenler yoq. Qaza yerinde qurtarıcılar ve kommunal hızmetler çalışa", - dep yazdı Sadovoy.
Evel şeerde ava telükesi signalı ilân etilgen edi. Şeer sakinleri ve içtimaiy ağlarınıñ qullanıcıları patlavlarnı saba eşitkenlerini bildireler.
Martnıñ 13-nde Rusiye Lviv vilâyetindeki Halqara barıştırıcı ve telükesizlik merkezine raketa darbelerini endirdi. Neticede 35 adam öldi, daa 134 yaranlandı.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
