Lviv mektep talebeleri işğal etilgen Qırımda mahküm etilip 185 künden berli açlıq tutqan ukrain faali Vladimir Baluhqa video muracaatını çıqardı.
«Vladimir, siziñ cesaretiñiz ve sabitligiñizden ğururlanamız. Siz vatanperverlikniñ örnegi olasıñız. Taras Şevçenko aytqanı kibi: Küreşiñiz – yeñersiñiz», – dep ayta Baluhqa muracaat etken mektep talebeleri.
Videoda Lviv mektebi üyken sınıflarınıñ altı talebesi iştirak etti.
Qırımda apiste tutulğan ukrain faali Vladimir Baluh 2018 senesi martnıñ 19-nda başlağan müddetsiz açlıqnı devam ete. Bir aydan berli bir şey aşamağan Baluh Arhiyepiskop Klimentni diñlep, kisel içmege, peksimet aşamağa razı olğan edi.
İyülniñ 5-nde Rusiye kontrol etken Aqşeyh rayon mahkemesi ukrain faali Vladimir Baluhqa 5 yıl apis cezası ve 10 biñ ruble (4 biñ grivna) para cezasını tayin etti.
FSB Vladimir Baluhnı 2016 senesi dekabrniñ 8-nde tuttı. FSB hadimleri Vladimir Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. Onıñ evinde Ukraina bayrağı bar edi.
