Lvivde Ukrainanıñ «Jurnalistikanıñ yüksek standartları-2018» mukâfatı berildi. «Keyfiyetli regional media leyhası» nominatsiyasında Crimean Tatars saytı ğalip çıqtı. Bu aqta mukâfat jürisiniñ azası Diana Datsük Facebook saifesinde yazdı.
«Keyfiyetli regional media leyhası» nominatsiyasınıñ ğalibi Lilâ Bucurovanı ilân etmege şeref oldı. Crimean Tatars leyhası qıyın işğal şartlarında çalışa. Amma çalışa. Ve bu büyük ürmet ve ayranlıq qazana. Qırım – Ukrainadır», – dep qayd etti Datsük.
Mukâfat daa eki kategoriyada taqdim etildi: «Eñ turğun, keyfiyetli media leyhası» (bihus.info leyhası içün tahqiqatçı-jurnalist Denis Bigus) ve «Zenaatta tez ve keyfiyetli inkişaf» (jurnalist Margarita Tulup).
2016 Senesi aprel ayında Qırımda qırımtatarlar aqqında Crimean Tatars saytı çalışıp başladı. Saytnıñ baş muarriri – qırımlı jurnalist Lilâ Bucurova.
Lilâ Bucurova – 2015 senesi aprelniñ 1-nde yarımadada işini toqtatmağa mecbur olğan ATR qırımtatar telekanalınıñ baş müdiriniñ sabıq muavinidir. ATR media şirketiniñ saibi Lenur İslâmovğa qarşı yarımadanıñ Rusiye prokuraturası «Qırım qamaçavını teşkil etkeni içün» cinaiy dava açtı. Bu dava çerçivesinde yarımadada qırımtatar faalleriniñ evlerinde tintüvler keçirildi. Jurnalist Lilâ Bucurovanıñ evinde de tintüv keçirilgen edi.
Rusiye Qırımnı işğal etken soñ esas Ukrainağa yarımadanıñ Rusiye akimiyeti siyasetinen razı olmağan eñ az 10 Qırım kütleviy haber vastası köçti.
