Qırımlı jurnalist, aq qorçalayıcı ve faal Lutfiye Zudiyeva Rusiye kontrolindeki Qırım Adliye nazirliginden memuriy protokol tizilmesi içün kelmek talabınen haber aldı. Onı «çetel casusları» qanunlarını bozğanında qabaatlaylar, dep haber ete «Qırım birdemligi».
O, avgustnıñ 27-nde Adliye nazirligi idaresine kelmek kerek.
«Müessiseni ziyaret etip, memuriy protokol tizilmesi içün sebeplernen ve malümatnen tanışırım. Kelgenim soñki qararğa pek tesir eter, dep tüşünmeyim, amma bu menim içün müim – açıq qalmaq, fikrini añlatmaq ve qanunğa köre areket etmek», – dep izaatladı aq qorçalayıcı.
Zudiyevanıñ aytqanına köre, 2025 senesi mayısnıñ 16-nda onı «çetel casusı» olaraq tanıma qararı onıñ jurnalist faaliyetinen bağlı. Laf «Gratı» ukrayin neşiriniñ saytındaki Qırımdaki siyasiy mabüslerniñ mahkemeleri aqqında maqaleleri ve aq qorçalayıcı teşkilâtlar – CNN, Newsweek, Committee to Protect Journalists ve digerleri aqqında kete. Bu intervyülarda o, faal, jurnalist, advokat ve din erbaplarınıñ taqip etilüvi aqqında tarif etti.
Bundan ğayrı, Adliye nazirligi Zudiyeva Front Line Defenders aq qorçalayıcı teşkilâtınıñ azası ola, dep bildire. Jurnalist «çetel casusları» cedveline kirsetilgenine mahkeme itiraz ete.
Zudiyeva Rusiye akimiyeti tarafından endi taqip etilgen edi. 2024 senesi fevralniñ 22-nde Canköyde evinde tintüv keçirildi. Onı Azatlıq Radiosınıñ haberlerini paylaşqanda çetel agenti olaraq işaretlemegeni içün «kütleviy haber serbestligini suistimal etkeninde» qabaatladılar. Martnıñ soñunda belli olğanına köre, Rusiye kontrolindeki Aqmescitteki Kiyev rayon mahkemesi Zudiyevağa «kütleviy haber serbestligini suistimal etüv» maddesine istinaden 2500 ruble para cezasını berdi.
«Çetel agentleri» qanunı Rusiyede 2012 senesi peyda oldı. Qanun Rusiye Adalet nazirligine çetelden para alsa ve siyasiy faaliyetnen oğraşsa, ticaretnen oğraşmağan teşkilâtlarnı çetel agentleri olaraq tanımasına imkân berdi. Soñra çetelden para almağan, amma çetel tesiri altında olğan matbuat vastalarını ve ayrı insanlarnı agent olaraq tanımaq mümkün oldı. Rusiye qanunlarında tış tesir olaraq ne qabul etile aydınlatılmay.