Qırımlı jurnalist, aq qorçalayıcı ve faal Lutfiye Zudiyeva onıñ Rusiye «çetel agentleri cedveline» kirsetilgeni sebebinden Rusiye Adliye nazirligine qarşı dava açtı. Bu aqta o, Facebook saifesinde haber etti.
«Rusiye Adliye nazirliginiñ meni «çetel agentleri» cedveline kirsetmek içün uquqiy sebepleri yoq edi, itiraz etilgen emir ise – qanunsız ve sebepsiz», – dep yazdı o.
Zudiyevanıñ qayd etkenine köre, o, «tek öz teşebbüsinen» faaliyet köstere.
«Çetel agentleri» cedveline kirsetilgenime itiraz bildirmek niyetindem, çünki tek öz teşebbüsimnen areket etem. Akimiyet vertikali ve yuqarıdan kelgen emirlerge alışqan insanlar bunı añlamay, amma kimse maña ne tüşünecegimni ve ne is etecegimni aytmay. Maña etrafımdaki şeylerni – babasız ösken balalarnı, tintüv ve apislerni, insanlarnıñ acısı ve telâşını körip tasvir etmek içün «çetel küç» ya da «tıştan bir tesir» kerekmey», – dep yaza Zudiyeva.
Mayısnıñ ortasında Rusiye Adliye nazirligi qırımlı jurnalist, aq qorçalayıcı ve faal Lutfiye Zudiyevanı «çetel agentleri» cedveline kirsetti.
Zudiyeva Rusiye akimiyeti tarafından endi taqip etilgen edi. 2024 senesi fevralniñ 22-nde Canköyde evinde tintüv keçirildi. Onı Azatlıq Radiosınıñ haberlerini paylaşqanda çetel agenti olaraq işaretlemegeni içün «kütleviy haber serbestligini suistimal etkeninde» qabaatladılar. Martnıñ soñunda belli olğanına köre, Rusiye kontrolindeki Aqmescitteki Kiyev rayon mahkemesi Zudiyevağa «kütleviy haber serbestligini suistimal etüv» maddesine istinaden 2500 ruble para cezasını berdi.
«Çetel agentleri» qanunı Rusiyede 2012 senesi peyda oldı. Qanun Rusiye Adalet nazirligine çetelden para alsa ve siyasiy faaliyetnen oğraşsa, ticaretnen oğraşmağan teşkilâtlarnı çetel agentleri olaraq tanımasına imkân berdi. Soñra çetelden para almağan, amma çetel tesiri altında olğan matbuat vastalarını ve ayrı insanlarnı agent olaraq tanımaq mümkün oldı. Rusiye qanunlarında tış tesir olaraq ne qabul etile aydınlatılmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
