Rusiye Adalet nazirligi qırımlı jurnalist, aq qorçalayıcı ve faal Lutfiye Zudiyevanı «çetel agentler» cedveline kirsetti.
Zudiyevadan ğayrı, cedvelge jurnalist ve «Pravoslaviye i zombi» Telegram kanalınıñ müellifi Kseniya Luçenko, videobloger Dmitriy Purkin («Ded Arhimed»), siyasetşınas ve publitsist Mihail Komin, «Mustaqil ekimler birligi» halqara cemaat teşkilâtı, «Yevropeyskiy Peterburg» cemaat-siyasiy areketi ve «Zemskiy syezd» teşkilâtı da kirsetildi.
Zudiyeva Rusiye akimiyeti tarafından endi taqip etilgen edi. 2024 senesi fevralniñ 22-nde Canköyde evinde tintüv keçirildi. Onı Azatlıq Radiosınıñ haberlerini paylaşqanda çetel agenti olaraq işaretlemegeni içün «kütleviy haber serbestligini suistimal etkeninde» qabaatladılar. Martnıñ soñunda belli olğanına köre, Rusiye kontrolindeki Aqmescitteki Kiyev rayon mahkemesi Zudiyevağa «kütleviy haber serbestligini suistimal etüv» maddesine istinaden 2500 ruble para cezasını berdi.
Zudiyeva «çetel agentler» cedveline kirsetilgenini şimdilik izaatlamadı.
«Çetel agentleri» qanunı Rusiyede 2012 senesi peyda oldı. Qanun Rusiye Adalet nazirligine çetelden para alsa ve siyasiy faaliyetnen oğraşsa, ticaretnen oğraşmağan teşkilâtlarnı çetel agentleri olaraq tanımasına imkân berdi. Soñra çetelden para almağan, amma çetel tesiri altında olğan matbuat vastalarını ve ayrı insanlarnı agent olaraq tanımaq mümkün oldı. Rusiye qanunlarında tış tesir olaraq ne qabul etile aydınlatılmay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
