Rusiye kontrolindeki Qırımnıñ Kyiv rayon mahkemesi qırımlı aq qorçalayıcı ve jurnalist Lutfiye Zudiyevanıñ üç yıl evelsi yapqan paylaşuvları içün berilgen para cezası qararını deñiştirmeyip, temyiz şikâyetini red etti.
Bu aqta advokatı Emil Kurbedinov«Qırım birdemligi» cemaat birleşmesin bildirdi.
«Saçma bir şey. Mahkeme oturışuvları, dava malümatlarına baqıp añlayım ki, mahkeme qanun ve kütleviy haber vastaları tarafından paylaşuv qaidelerinde belgilengen nizamğa degil de, başqa bir şeyge esaslana. O, (Lutfiye Zudiyeva) bir şahıs olaraq şahsiy kanalda mahkeme oturışuvları aqqında malümat derc etti. Uquq qoruyıcı organları ve olarğa hızmet etken mahkeme sıfatında devlet halq böyle siyasiy mahkeme esnaslarından haberdar olmasın dep, elinden kelgenini yapmağa tırışa. İnsanlar indemesin ve olğan şeylerni bile aytmasın», – dedi Kurbedinov.
Advokatnıñ bildirgenine köre, temyiz mahkemesi aq qorçalayıcığa qarşı qararını deñiştirmese, o, halqara qurulışlarğa muracaat etmege mecbur olacaq.
2021 senesi yanvar ayında yapılğan paylaşuvlar mahkeme oturışuvınen bağlı edi. Anda Qarasuvbazardaki «Hizb ut-Tahrir davasının» mabüsleri içün Rusiye prokurorları büyük apis cezalarını talap etken edi. Bunda ğayrı, paylaşuvlarda Qırımnıñ çeşit regionlarında keçirilgen qoltutuv tedbirleri aqqında aytıldı.
Daa evel belli olğanına köre, Rusiye qurğan Aqmescitniñ №10 Mirovoy mahkemesi Lutfiye Zudiyevağa «kütleviy malümat serbestligini suistimal etüv» içün 2 biñ ruble para cezasını berdi.
Fevralniñ 22-nde Canköyde Rusiye quvetçileri jurnalist ve uquq qoruyıcı Lutfiye Zudiyevanıñ evinde tintüv keçirdi. Onı, «Radio Svoboda» malümatını «yabancı agent» olaraq qayd etmeden yayınlağanı içün, «matbuat serbestligini qullanuvda» qabaatladılar. Lutfiye Zudiyeva «Qırım birdemligi» uquq qoruyıcı birleşmesiniñ koordinatorıdır. Martnıñ soñunda belli olğanına köre, Rusiye kontrolindeki Aqmescit Kiyev rayon mahkemesi Zudiyevağa 2500 ruble para cezasını berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
