Mahkeme Rusiye kontrolindeki Aqmescit Kiyev rayon mahkemesiniñ qararına qarşı şikâyetni red etti.
Zudiyevanıñ advokatı Emil Kurbedinov bildirgenine köre, imaye bu qararnı temyiz qurulışta şikâyet etmege niyetlene. Kurbedinov bu davanen bağlı bir sıra bozuvğa diqqat celp etti. Advokatnıñ qayd etkenine köre, Rusiye memuriy uquq bozuvları kodeksine köre İç işler nazirligi Zudiyevağa para cezası berilgen maddege istinaden protokol tizemez.
Aq qorçalayıcı içtimaiy ağlardaki saifesinde Rusiyede çetel agenti olaraq tanılğanını yazmayıp eki neşirniñ maqalelerini paylaşqanı içün para cezasını aldı, dep hatırlattı. Zudiyeva içtimaiy ağlardaki saifesi şahsiy ola ve kütleviy haber vastası olaraq qayd etilmedi, dep añlattı. Onıñ fikirince, bu çetel agenti yazısını qaldırmamağa imkân bere.
Aq qorçalayıcınıñ fikirince, Ekstremizm ile küreş idaresiniñ vekilleri Qırımda aq qorçalayıcı faaliyetini toqtatmağa istey, çünki aq qorçalayıcılar insan aqları bozulğanını aydınlata.
Fevralniñ 22-nde Canköyde Rusiye quvetçileri jurnalist ve uquq qoruyıcı Lutfiye Zudiyevanıñ evinde tintüv keçirdi. Onı, «Radio Svoboda» malümatını «yabancı agent» olaraq qayd etmeden yayınlağanı içün, «matbuat serbestligini qullanuvda» qabaatladılar. Lutfiye Zudiyeva «Qırım birdemligi» uquq qoruyıcı birleşmesiniñ koordinatorıdır.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
