Ukrayına prezidentiniñ Qırım Muhtar Cumhuriyeti temsilcisiniñ muavini Olğa Kurışko Qırım.Aqiqat Radiosınıñ yayınında Rusiye uquq qoruyıcılarınıñ qırımlı jurnalist ve aq qorçalayıcı Lutfiye Zudiyevanı tutqanını ve «kütleviy malümat serbestligini suistimal etüvde» qabaatlağanını izaatladı.
Onıñ aytqanına köre, Rusiye kontrolindeki Qırım akimiyetiniñ talaplarına uymağan er angi malümat telüke olaraq tasnif etile. Bu telükeni yoq etmek içün olar insanlarğa basqı yapalar.
«Meyiller, ne yazıq ki, tesellisiz. Doğrusını aytqanda, deñişmey. Yani insanlar tutula, sahte qabaatlavlar tanıtıla. Keçenleri daa bir advokat, Emil Kurbedinov tutulğan edi. Yani işğal etilgen topraqta qalğan ve qarşı çıqqan insanlar ya qanunsız mahküm etilgenlerni qorçalay, ya da qanunsız tutulğanlarnı qorçalay, olar toqtamayıp taqip etile. Şimdi ise jurnalist ve advokat toplulıqlarını temsil etkenlerge sıra keldi», – dep ayttı Qırım.Aqiqat Radiosında Olğa Kurışko.
Ukrayına prezidentiniñ Qırım Muhtar Cumhuriyetiniñ temsilciligi Lutfiye Zudiyevanıñ qanunsız tutuluvını takbih etip, jurnalist ve aq qorçalayıcınıñ taqip etilüvini acele toqtatmağa talap etti. Anda halqara toplulıqnı cevap bermege ve işğal altındaki Qırımda jurnalistlerniñ taqip etilüvini takbih etmege çağırğanlar.
Qırımda meşur olğan jurnalist ve aq qorçalayıcı, «Qırım birdemligi» aq qorçalayıcı birleşmesiniñ koordinatorı Lutfiye Zudiyeva fevralniñ 22-nde Rusiye uquq qoruyıcıları tarafından Canköydeki evinde keçirilgen tintüvden soñ tutuldı.
Lutfiye o künü yiberildi, oñ qarşı «kütleviy malümatnı suistimal etüv» sebebinden eki memuriy protokol tizildi. Bir danesi Facebook saifesinde «Hizb ut-Tahrir» areketi Rusiyede terror teşkilâtı olaraq tanılıp yasaqlanğanını yazmağanı içün, digeri «Azatlıq Radiosını» qayd etip, «çetel agenti» statusını bildirmegeni içün eken.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
