«Gratı» neşiri jurnalisti ve qırımlı aq qorçalayıcı Lutfiye Zudiyevanı ve iyülniñ 27-nde Rusiye kontrolindeki Qırım Yuqarı mahkemesiniñ binası ögünde Rusiye uquq qoruyıcıları tarafından tutulğan diger qırımlı faallerni acele azat etmege talap ete.
«Gratı» hatırlatqanlarına köre, muarririyet vazifesine köre Zudiyeva Qırımtatar Milliy Meclisi reisiniñ birinci muavini Nariman Celâl ve ağa-qardaş Asan ve Aziz Ahtemovlarnıñ mahkeme oturışuvını aydınlatmalı edi.
«Zudiyevanı mahkemege kirsetmeyip tutqanlar. Daa 12 qırımtatarı tutuldı – mahkemege kelgen ve açıq oturışuvğa kirmege tırışqan Celâl ve Ahtemovlarnıñ soy-sopları ve dostları. Tutulğanlar arasında «Grani» neşiriniñ mühbiri Kulamet İbraimov da bar. Tutulğanda Zudiyeva polis hadimlerine matbuat kartını kösterip, muarririyet vazifesini yerine ketire, dep ayttı, lâkin olar qulaq asmadılar. Jurnalist Aqmescitteki Jeleznodorojnıy rayon polisiniñ bölügine ketirildi, anda qorquza-qorquza parmaq izleri ve silekey örneklerini bermege mecbur ettiler. O, razı olmadı. Neticede jurnalistke qarşı memuriy protokol tizildi», – dep aytıla haberde.
«Gratı» Ukrayına, halqara jurnalist birleşmeleri ve aq qorçalayıcı teşkilâtlarğa muracaat etip, tutulğan jurnalistni qorumağa ve Rusiye akimiyeti Qırımda taqip etken zenaatdaşlarına birdemlik köstermege rica ete.
Ukrayına prezidentiniñ Qırım Muhtar Cumhuriyetindeki temsilciligi işğal etilgen Qırımda Kreml kontrolindeki Aqmescit mahkemesiniñ binasına Nariman Celâl ve ağa-qardaş Asan ve Aziz Ahtemovlarğa qoltutmağa kelgen soy-sopları, aq qorçalayıcılar, jurnalist ve cemaat faalleriniñ uquq qoruyıcılar tarafından tutuluvını takbih etip, «bütünley qanunsız» dep adlandırdı.
Berilgen malümatqa köre, iyülniñ 27-nde mahkeme binası ögünde şikâyet arizası baqılğan Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Berilgen malümatqa köre, Rusiye kontrolindeki Qırım Yuqarı mahkemesiniñ binası ögünde tutulğanlar arasında qırımlı aq qorçalayıcı Lutfiye Zudiyeva, siyasiy mabüs Aziz Ahtemovnıñ anası Zarema Ahtemova, «Qırım birdemliginiñ» mühbiri Kulamet İbraimov ve siyasiy mabüs Nariman Celâlnıñ qardaşı Ruslan Celâlov bar.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
