Rusiye kontrolindeki Qırım Yuqarı mahkemesiniñ binası ögünde qırımlı aq qorçalayıcı Lutfiye Zudiyeva bar edi. Bu malümatnı Qırım.Aqiqat mühbiri tasdıqladı.
Bugün mahkeme binası ögünde Nariman Celâl ve ağa-qardaş Asan ve Aziz Ahtemovlarnıñ tarafdarları toplaştı. Davalarında şikâyet arizası baqılacaq. Aq qorçalayıcılarnıñ malümatına köre, saat 10:30-da 13 insan tutuldı – 10 erkek ve üç qadın.
Zudiyeva aprel ayında intervyü berip, Qırımda aq qorçalayıcılar toqtamağan basqı altında bulunalar, dep aytqan edi.
2022 senesi sentâbrniñ 21-nde Rusiye kontrolindeki Qırımnıñ Yuqarı mahkemesi Nariman Celâlnı 17 yıl sert rejimli koloniyada qalmasına üküm etti. Bundan ğayrı, 700 biñ ruble para cezası berildi ve azatlığı 1,5 yılğa sıñırlandı.
Asan Ahtemov 15 yıl sert rejimli koloniyada qalmasına üküm etildi. Oña 500 biñ ruble para cezası berildi ve 1 yıl qadar azatlığı sıñırlandı. Aziz Ahtemov 13 yıl sert rejimli koloniyada qalmasına üküm etildi. Oña da 500 biñ ruble para cezası berildi ve azatlığı 1 yılğa sıñırlandı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
