Daa evel belli olğanına köre, Rusiye qurğan Aqmescitniñ №10 Mirovoy mahkemesi Lutfiye Zudiyevağa «kütleviy malümat serbestligini suistimal etüv» içün 2 biñ ruble para cezasını berdi.
Paylaşuvları mahkeme oturışuvınen bağlı edi, anda Qarasuvbazardaki «Hizb ut-Tahrir davasının» mabüslerine uzun apis cezaları berildi, Qırımnıñ çeşit regionlarında olarğa qoltutmaq içün yapılğan tedbirler de aytıldı.
«Qırımnıñ Ekstremizm ile küreş merkeziniñ hadimleri Zudiyeva mahkeme qararınen yasaqlanğan ve Rusiye Federatsiyasında terror teşkilâtları dep tanılğan teşkilâtlarnıñ federal cedvelinde olğan teşkilât aqqında yazıp, yasaqlanğanını qayd etmedi, dep qarar çıqardı», – dep bildirdi «Qırım birdemligi».
Qayd etilgenine köre, Ekstremizm ile küreş merkeziniñ bölük yolbaşçısı Ruslan Şambazov esabatında «Zudiyeva jurnalist olaraq tanıtıla, vatandaşlardan intervyü ala», şunıñ içün Facebook saifesi «iş maqsadınen qullanıla», dep bildirdi. Şambazov angi maqsadlar aqqında ayta ve bu memuriy davanen alâqası ne – esabatta añlatmay.
Berilgen malümatqa köre, qadı Sergey Moskalenko Zudiyeva ve imayecisi Emil Kurbedinovğa Şambazovnı mahkemege çağırmaq talabını red etip, «muracaatnıñ sebebi yoq», dep ayttı. Amma memuriy protokolnı tizgen «E» Merkeziniñ hadimi Roman Filatovnı çağırdı.
Zudiyeva Qırımda böyle davalarda 100 kişiden çoq bar, dep ayttı. Dava mabüsleriniñ sayısı çoq olğanından olarnı coğrafik alâmetlerge köre ayırğanlar.
İmayeciler ve Lutfiye Zudiyeva mahkeme qararını şikâyet etip, soñra temyiz mahkemesine muracaat etecekler, dep bildirdi.
Fevralniñ 22-nde Canköyde Rusiye quvetçileri jurnalist ve uquq qoruyıcı Lutfiye Zudiyevanıñ evinde tintüv keçirdi. Onı, «Radio Svoboda» malümatını «yabancı agent» olaraq qayd etmeden yayınlağanı içün, «matbuat serbestligini qullanuvda» qabaatladılar. Lutfiye Zudiyeva «Qırım birdemligi» uquq qoruyıcı birleşmesiniñ koordinatorıdır. Martnıñ soñunda belli olğanına köre, Rusiye kontrolindeki Aqmescit Kiyev rayon mahkemesi Zudiyevağa 2500 ruble para cezasını berdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
