Aleksandr Lukaşenko 2022 senesi Rusiye prezidenti Vladimir Putinnen onuncı kere körüşti, dep yaza Azatlıq Radiosınıñ Beyazrusiye hızmeti.
Bu körüşüvlerden tek bir danesi Minskte (dekabrniñ 19-nda) oldı, soñki körüşüv dekabrniñ 24-nde Rusiyeniñ Yıldız şeerçiginde keçirildi.
Dekabrniñ 27-nde Putin ve Lukaşenkonıñ Rus müzeyiniñ salonlarından birinde resimler altında körüşkenleri belli oldı, dekabrniñ 26-da ve 27-nde Sankt-Peterburgda Mustaqil devletler birligi memleketleriniñ yolbaşçılarınıñ resmiy olmağan körüşüvi keçirile.
Putin bunı «güzel müitte subetleşüv» dep adlandırdı. Rus müzeyinde iş qavaltısı da teşkil etildi. Aleksandr Lukaşenko aytqanına köre, bir kün evelsi aqşam Rusiye prezidentinen çoq şey muzakere etildi ve «bazı meseleler tam olaraq belgilendi».
«Minsk subetimizni devam ettiremiz, esasen iqtisadiyatnen bağlı», – dep bildire Lukaşenkonıñ aytqanlarını «İnterfaks» Rusiye neşiri. Lukaşenkonıñ matbuat hızmetine yaqın «Pul Pervogo» Telegram kanalı yazğanına köre, Mustaqil devletler birligi memleketleriniñ yolbaşçılarına Sankt-Peterburgdaki resmiy olmağan sammitte körüşüv içün yapılğan yılbaş hayırlavlarınen «klub yüzükleri» ediye etildi.
Peterburgdaki körüşüvde Azerbaycan, Qırğızistan, Tacikistan, Turkmenistan, Özbekistan, Qazahistan ve Ermenistan liderleri iştirak etti.
Putin ve Lukaşenkonıñ Minsk körüşüvi aqqında keçken afta haber etildi. Rusiye prezidenti Rusiyeniñ Ukrayınağa qarşı cenkinen bağlı meselelerde faal oldı ve ekspertler Moskva qomşu memleketke ekinci arbiy istilâ planlaştıra bile, dep haber etti. Amma bu sefer Beyazrusiye gruppirovkalarınen beraber ücüm ete bile eken. Fevral ayında büyük istilâ başlağanından berli Vladimir Putin dekabrniñ 19-nda Minskke ilk sefer keldi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
