Beyazrusiye prezidenti Aleksandr Lukaşenko kene Rusiyege kete, dep bildire matbuat hızmeti. Berilgen malümatqa köre, Rusiye prezidenti Vladimir Putinniñ davetinen o, Yıldız şeerçigini ziyaret etecek – Gagarin kosmonavtlarnı azırlav merkezi, şimdi anda Beyazrusiyeden kâinatqa uçacaq namzetler saylana.
Soñra Lukaşenko dekabrniñ 26-27-nde Sankt-Peterburgda keçirilecek SNG devlet yolbaşçılarınıñ resmiy olmağan körüşüvinde iştirak etecek. Azatlıq Radiosınıñ Beyazrusiye hızmeti qayd etkenine köre, 2022 senesi Lukaşenko Putinnen sekiz kere körüşti, soñki körüşüv Minskte dekabrniñ 19-nda olıp keçti.
Ukrayına Mudafaa naziri Oleksiy Reznikov Rusiye bugünki künde Beyazrusiyede ücüm gruppirovkasını qurmadı, dep bildirdi.
Beyazrusiye Ukrayınadaki cenkniñ iştirakçisi degil, amma Rusiye istilâsına maddiy-tehnik yardım köstere. Hususan Rusiye ordusına Beyazrusiyege kirmege imkân bere, andan ise Rusiye quvetleri Ukrayına şeerlerine bombardıman yapa, Ukrayınağa raketa ata.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
