Martnıñ 31-ne qadar Rusiye Federatsiyasınıñ arbiyleri Donetsk ve Lugansk vilâyetleriniñ memuriy sıñırlarına çıqmaq niyetinde – bu olarnıñ strategik vazifesidir. Bu aqta Ukrayına Mudafaa nazirliginiñ Baş istihbarat idaresiniñ reberi Kırılo Budanov Forbes intervyüsında ayta.
«Büyük ücüm endi devam ete. Amma böyle devam ete ki, er kes körmey bile, keyfiyeti böyle. Strategik vazifeleri bar – martnıñ 31-ne qadar Donetsk ve Lugansk vilâyetleriniñ memuriy sıñırlarına çıqmaq», – dep qayd etti o.
Budanovnıñ fikirince, Rusiye ordusı bunı kerçekleştirip olamaz.
Al-azırda rusiyeliler top snarâdlarını kütleviy şekilyed işlep çıqara, bu olarnıñ uruşta eksikligini ifadeley.
«Eki aydan berli bizde areket etken Rusiye gruppirovkaları silânı tutumlı qullana. Tek Bahmut ve Liman yönelişlerinde silâ bir qarar qullanıla. Ugledarğa bir qaç kere ücüm etmege tırışqanlar ve devam etecekler, bu yer de qoşuldı. Başqa yerlerde silâ tutumlı qullanıla», – dep qoştı Ukrayına istihbaratınıñ yolbaşçısı.
Budanov, eñ müim uruşlar baarniñ ortası ve soñunda olacaq, dep ayttı. Onıñ aytqanına köre, Rusiye ile cenk taqdiri baarniñ soñuna doğru belli olur. O, bu sözlerni «tahmin» dep saymay, olarğa «hulâsa» dep ayta.
Milliy telükesizlik ve mudafaa şurasınıñ kâtibi Oleksiy Danılovnıñ fikirince, Rusiye ordusınıñ Ukrayınadaki büyük ücüm ümütleri kerçekleşmey. Amma, onıñ aytqanına köre, bu ücüm endi devam ete.
The New York Times neşiri Amerika istihbaratına esaslanıp, Rusiyede yaqın vaqıtta yañı seferberlik ola bile ve yüz biñlernen insan orduğa alına bile, dep yazdı.
«Amerika istihbaratınıñ vekilleri o, (Rusiye prezidenti Vladimir Putin – QA) orduğa daa çoq rusiyelini seferber ete bile, endi çağırılğan 300 biñge daa yüz biñlernen insannı qoşa bile, dep malümat alğanını ayta», – dep yaza neşir.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
