Rusiyede Türkiye ombudsmenine Rusiye Federatsiyasınıñ toprağında ukrayin esirlerini ziyaret etmesine ruhset bermekni tüşüneler, dep bildirdi Azatlıq Radiosınıñ efirinde insan aqları vekâletlisi Dmıtro Lubinets.
"Bu, Rusiye Federatsiyasınıñ toprağında cenk esirleriniñ aq-uquqlarını bozuv vaziyetini deñiştirmek içün taktikamıznıñ daa bir parçasıdır. Tekrar, siz tek açıq mevamnı kördiñiz. O, Ukrayinağa keldi, Rusiye Federatsiyasını ziyaret etmege niyetlengenini bildirdi. Biz bu iş üzerinde aylarnen çalıştıq", - dedi Lubinets.
"Başta bu gizli körüşüvler edi, o, bu meseleni al etmege azırmı-yoqmı muzakere etile edi. Men türkiyeli zenaatdaşıma, o sadece razı olmağanı içün ayrı teşekkürler bildirmek isteyim. O, dört künge şahsen keldi, bir taraftan Ukrayinanıñ bütün toprağı daimiy atışlar altında olğanını körgenlerine baqmadan, diger taraftan ise, muqaddes Ramazan ayı edi ve alâ devam ete. Amma o keldi. Qaytqan soñ, o, maña eki kün keçken soñ, Rusiye tarafınen ilk kontakt, muzakere olğanını bildirdi. Soñra Moskalkovanen körüşkenini açıqtan kösterdiler, muzakere ettiler. Bugünki künde maña Rusiye tarafı türk tarafınıñ – yani Türkiye ombudsmeniniñ, Rusiye Federatsiyasınıñ territoriyasında ukrayin arbiy esirlerini ziyaret etmesine rehset berip bermemekni tüşünmek içün vaqıt alğanı aqqında haber etildi. Bekleymiz", – dep qoştı o.
Dmıtro Lubinets Roma papasınıñ "er kesni er keske" formatında deñiştirmek çağıruvları aqqında da ayttı. Onıñ aytqanına köre, bu ukrayin tarafınıñ faalligi neticesidir.
"Şimdiki vaqıtta, er kesni er keske deñiştirmek içün büyük bir deñişimniñ ögünde bulunğanımızğa dair bir tahminim bar, dep aytıp olamam. Bunıñ üzerinde çalışmaymız demek degil. Amma kene de, yekâne mesele - bizge qarşı çıqqan mesele - Rusiye tarafınıñ deñişim esnaslarını keçirmek istemeycegidir", – dep qoştı Ukrayina ombudsmanı.
Fevralniñ soñunda Ukrayina Baş prokurorınıñ silâlı zıddiyet şaraitlerinde yapılğan cinayetlerge qarşılıq kösterüv departamentiniñ yolbaşçısı Yuriy Belousov bildirdi ki, uquq qoruyıcılar ukrayin arbiy esirlerniñ öldürüvinen bağlı 19 cinaiy işni tahqiq ete. Onıñ aytqanına köre, istilâ başlağanından berli 45 ukrayin arbiyi esirlikte elâk oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
