Yuqarı Radanıñ İnsan aqları vekâletlisi Dmıtro Lubinets Rusiye akimiyetiniñ azat etilgen “qırımlı musulmanlar davasınıñ” mabüsleri Aleksandr Sizikov ve Lenur Halilovnı apishanege qaytarmaq qararına cevap berdi.
Lubinets qayd etkenine köre, Rusiye akimiyetiniñ böyle areketleri Avropa insan aqları şartnamesiniñ 2-nci maddesinen kefil etilgen ayat aqqını boza ve “Rusiye ağır hasta insanlarnı apiske qaytarıp, ayatlarını telükege oğrata”, dep bildirdi.
Ukrayina ombudsmeni Rusiye akimiyetiniñ Sizikov ve Halilovğa çıqarğan qararlarını takbih etip, Rusiyeden apiste tutulğan ağır hasta Ukrayina vatandaşlarını azat etmege talap etti.
“Halqara toplulıqnı Rusiye qanunsız tutqan ukrayinalılarnı azat etüvde yardım etmege çağıram”, – dep yazdı Lubinets Telegram kanalında.
Hatırlatamız, tünevin aqşam Qırımnıñ Bağçasaray rayonında Rusiye uquq qoruyıcıları tintüv keçirdi ve “qırımlı musulmanlar davasınıñ” soqur mabüsi Aleksandr Sizikovnı alıp ketti.
Oktâbrniñ 21-nde Rusiyedeki Krasnoyarsk ülke mahkemesi “qırımlı musulmanlar davasınıñ” soqur mabüsi Aleksandr Sizikovnıñ azat etilmesinen bağlı qararnı lâğu etip, onı Qırımdaki evinden apishanege qaytarmağa qarar çıqardı.
“Qırım birdemliginiñ” uquqçısı Nazim Şeyhmambetov haber etkenine köre, istinaf mahkemesi Rusiye prokuraturasınıñ muracaatını qanaatlendirdi. Böyle qararnı talap etken qabaatlav tarafınıñ delilleri belli degil, çünki Rusiyeniñ Krasnoyarsk ülkesinde tasdıqlanğan Sizikovnıñ soqurlığı koloniyada tutulmasına mania olğan hastalıqlar cedvelinde bar.
Hatırlatamız, bu yıl mayısta Krasnoyarsk ülkesiniñ Minusinsk şeer mahkemesi Sizikovnı soqur olğanından azat etti, o, Qırımğa qayttı.
Aynı vaziyetke “Aluşta” mustaqil musulman cemiyetiniñ sabıq reisi Lenur Halilov da oğradı. Avgust ayında qanser diagnozı qoyulğan soñ evine qayttı. Lâki oktâbr ayında Rusiye prokurorı mahkeme qararına istinaf etti. Şimdi Halilov evde buluna ve Arhangelsk vilâyetiniñ mahkemesinden istinaf aslını bekley. Soñra onı apiske alıp, Arhangelskteki İK-1-ge yollaycaqlar.
Rusiye mahkemeleri Sizikov ve Halilovnı Rusiyede terror teşkilâtı olaraq tanılğan ve bir çoq memlekette yasaqlanğan “Hizb ut-Tahrir” teşkilâtı ileye alâqalarında qabaatlanıp, uzun müddetlerge üküm etildi.
