Ukrayina Yuqarı Radasınıñ insan aqları vekâletlisi Dmıtro Lubinets Rusiye ombudsmeni Tatyana Moskalkovağa muracaat etip, «qırımlı musulmanlar davasınıñ» mabüsi ağır hasta Tofik Abdulgaziyevni azat etmege talap etti.
Lubinets aytqanına köre, apishane şaraitleri ve vaqtında kösterilmegen tibbiy baquv sebebinden erkek 40 kg azdı, apiske alınmazdan evel olğan sağlıq problemleri peyda oldı.
«2024 senesi mart ayında Abdulgaziyevniñ alı birden fenalaşqanı içün onı hastahanege alğanlar ve verem ve diger ağır hastalıqları qayd etildi», – dep bildirdi Lubinets Telegram kanalında.
Ukrayina ombudsmeni aytqanına köre, «mabüslerge kerekli tibbiy yardım kösterilmemesi İnsan aqlarını qorçalav şartnamesiniñ 3-ünci maddesi ve «İşkence yasağı» esas serbestlikleri bozulğanını köstere».
«Türkiye, Katar, Birleşken Arap Emirlikleri, Saudiy Arabistandan halqara zenaatdaşlarıma muracaat yollap, tedaviylenmegen hastalıqlar sebebinden mabüsni azat etmege yardım etmelerini rica ettim», – dep bildirdi ombudsmen.
Belli olğanına köre, Çelâbinskteki Rusiye mahkemesi advokatlarnıñ sağlığı apiste fenalaşqan «qırımlı musulmanlar davasınıñ» mabüsi Tofik Abdulgaziyevniñ azat etilüvi aqqında muracaatını red etti.
Abdulgaziyev reanimatsiyada edi, bir aydan soñ veremden ğayrı bir sıra diger hastalığı tapıldı. Olarnıñ arasında – eki taraflı pnevmoniya, kiçik sol taraflı gidrotraks (aqcigerde şingenlik), anemiya, mitral klapanğa zarar ketirgen birleştirici toquma displaziyasınıñ sindromı, hronik yürek yetersizligi ve gastrit.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
