Ukrayina Yuqarı Radasınıñ insan aqları vekâletlisi Dmıtro Lubinets, Rusiye Cezalarnı yerine ketirüv federal hızmeti ekinci Aqmescit "Qırım musulmanları davası"nıñ figurantı Tofik Abdulgaziyevniñ sağlıq vaziyeti aqqında soy-soplarına haber etmege red etkenine cevap berdi. "Qırım birdemligi" haber etkenine köre, onı Rusiyeniñ Verhneuralsk apishanesinden Çelâbinskte tuberkulöz hastahanesiniñ reanimatsiyasına alıp kettiler.
Lubinets, Rusiye böyle areketlerinen halqara gumanitar uquqnı boza, dep bildirdi.
"Martnıñ 22-nde Tofik Abdulgaziyev ağır alda tuberkulöz hastahanesine alındı. Siyasiy mabüsniñ apayına baş ekim, aqayınıñ alı qanaatlendirici olğanını bildirdi. Amma oña nasıl tedaviylevni keçkenini aytmaylar, siyasiy mabüsniñ sağlığı aqqında kerçek bir şey aytmaylar", – dep yazdı Lubinets öz telegram kanalında.
Lubinetsniñ malümatına köre, 216 qanunsız mahküm etilgen qırımlı siyasiy mabüsniñ eñ azından 36-sı acele tibbiy yardımğa muhtac, olardan 27 - qırımtatar.
Tofik Abdulgaziyev apiske alınmazdan evel Qırım siyasiy mabüsleriniñ balaları içün tedbirlerniñ teşkil etilmesinde iştirak ete edi. "Qırım birdemligi" cemaat birleşmesiniñ faali, ses operatorı, "Qırım balalığı" leyhasınıñ iştirakçisi edi.
Bundan ğayrı, siyasiy mabüslerge SİZO-ğa aşayt mallarını berüvnen oğraşa, siyasiy sebeplernen bağlı davalar boyunca mahkemelerge bara, evlerinde tintüv keçirilgen semetdeşlerge qol tutmağa kele edi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
2022 senesi mayısnıñ 12-nde Rostov-na-Donudaki Cenübiy bölgesiniñ arbiy mahkemesi ekinci Aqmescit "Hizb ut-Tahrir davası"nıñ mabüsleri Tofik Abdulgaziyev, Vladlen Abdulkadırov, İzzet Abdullayev, Mecit Abdurahmanov ve Bilâl Adilovğa üküm çıqardı. Olar 12 ile 14 yıl apis cezalarsına mahküm etildiler. İzzet Abdullayev ilk 5 yılını apishanede keçirecek 12 yıl sert rejimli koloniyada qalmasına ve azat etilgen soñ 1 yıl azatlığı sıñırlanacaq, dep üküm çıqarıldı.
2023 senesi iyül ayında Tofik Abdulgaziyev Rusiye Federatsiyasınıñ Çelâbinsk vilâyetiniñ Verhneuralsk apishanesine etap etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
