Qırımnıñ Rusiye akimiyeti tutulğan jurnalistler İrına Danılovıç ve Amet Suleymanovğa tibbiy yardım köstermey – olarğa yapılğanlar işkence dep sayıla bile. Bu aqta Yuqarı Radanıñ insan aqları vekâletlisi Dmıtro Lubinets bildirdi.
«Tedaviylenmese, yanğı miyine keçip, qadınnı öldüre bile. Aman-aman 20 künden soñ, ekimler onı baqmağa istegende, jurnalist quru açlıqnı toqtattı. Lâkin tek baqqanlar, bir şey aytmadılar ve bir tedaviylev belgilemediler», – dedi ombudsmen.
Onıñ bildirgenine köre, Amet Suleymanovnıñ da sağlıq problemleri bar.
«Erkekniñ ciddiy yürek hastalıqları bar, acele ameliyatqa muhtac. Kiçik bir mağazda tutalar – SİZOnıñ karantin bölügi, anda daa 11 kişi tutula. Eki afta devamında böyle şaraitlerde bulunması öksürik ve nefes darlığınıñ sebebi oldı», – dep tarif etti Lubinets.
Lubinets, qanunsız tutulğan Ukrayına vatandaşlarına tibbiy yardım kösterilmemesi işkence sayıla bile, dep qayd etti. O, eki qırımlı Cemil Gafarov ve Konstantin Şiring Rusiye apishanesinde kerekli tibbiy yardım alamayıp vefat etkenler, dep hatırlattı.
Amet Suleymanov ve İrına Danılovıç – yarımadanıñ Rusiye akimiyeti apiske alğan qırımlı jurnalistler.
Qırımdaki Rusiye mahkemesi Danılovıçnı yedi yılğa, Suleymanovnı 12 yılğa üküm etti. Üç yıl devamında Suleymanov sağlıq vaziyeti sebebinden ev apsinde edi, amma aprelniñ 6-nda apiske alınıp, izolâtorğa qapatıldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
