Londonnıñ Vue Cinema kinoteatrinde Rusiye tarafından siyasiy sebeplerden qanunsız apiske alınğan 70-ten ziyade Ukraina vatandaşı aqqında «Putinniñ reineleri: Kremlniñ ukrainalı siyasiy mabüsleri» filmi ilk sefer kösterildi.
Soñra muzakere oldı, seyirciler kinorejissöri ve film prodüserine, em de aq qorçalayıcı Mariya Tomak ve advokat Nikolay Polozovğa sual berdi.
Film «üç siyasiy mabüs – Bekir Degermenci, Pavlo Ğrıb, Yevğen Panov misalinde Kreml reineleriniñ fenomeni» aqqında tarif ete.
Filmde Rusiye mahkemesi tarafından mahküm etilgen ve soñra azat etilgen Gennadiy Afanasyev ve Ahtem Çiygoz añıla.
Filmni Poloniya kinorejissörları ve jurnalistleri Bojedar Payak ve Petr Malinovskiy Ukrainadaki Britaniya elçihanesiniñ desteginen çıqardılar. Prodüser – Alâ Şandra.
Ukraina Tış işler nazirliginiñ malümatına köre, 2018 senesi iyül ayına qadar eñ azından yigirmi dört Ukraina vatandaşı Rusiyede ve daa 40 siyasiy mabüs işğal altındaki Qırımda siyasiy sebeplerden apiste tutula.
