60-tan ziyade eyyet 2026 senesi dekabrniñ 7-nde Londonda olacaq Qırım platformasınıñ beşinci parlament sammitinde iştirak etecegini tasdıqladı. Bu aqta Qırımtatar Milliy Meclisiniñ reisi Refat Çubarov Ukrayinada Büyük Britaniya işleri vaqtınca müdiri olğan Charlotte Surun ile körüşip ayttı.
Çubarovnıñ bildirgenine köre, oktâbrniñ 22-nde olğan körüşüv vaqtında taraflar işğal etilgen Qırımda insan aqları vaziyeti, Rusiye-Ukrayina cenki ve halqara forum azırlığı muzakere etildi.
"Qırım platforması iştirakçileri erkânına kirecek Meclis azaları içeriginen bağlı tekliflerini ayttı", – dep yazdı Çubarov Facebook saifesinde.
Meclis reisi qayd etkenine köre, olacaq sammit Qırımnı işğalden qurtaruv siyasetiniñ ileriletmesi ve Ukrayinağa Rusiye ile cenkni toqtatuv çerçivesinde topraq uzlaşuvlarını qabul ettirmek ıntıluvlarına qarşı tirenüv içün müim bir halqara meydançıq olaraq baqıla.
"Meclis vekilleri Ukrayina ve qırımtatar halqı içün eki manalı uzlaşuvlar yoq, dep qayd etti: Qırımnen bağlı er angi topraq uzlaşuv lafları ve statusınen bağlı meseleniñ çezilüv sozuluvınıñ barışıqnen bir bağı yoq", – dep bildirdi Çubarov.
Onıñ fikirince, böyle stsenariy qırımtatar halqınıñ bar olması içün doğrudan bir telüke olacaq.
Körüşüvde Qırımlı siyasiy mabüslerniñ vaziyetine ve Rusiye akimiyetiniñ yarımada sakinlerini taqip etüvine diqqat ayırıldı. Meclis vekilleri qayd etkenine köre, repressiyalarnıñ toqtatıluvı ve Qırımlılarnıñ telükesizligini temin etüv Qırımnıñ işğalden azat etilüvinen ve yarımadada Ukrayina suverenitetini ğayrıdan tiklevden soñ mümkün.
Çubarov bildirgenine köre, Britaniya tarafı Ukrayina topraq bütünligine ve Rusiye işğal etken bütün Ukrayina topraqlarınıñ halqara uquqqa köre deñişmegen qoltutuvını tasdıqladı.
Britaniya parlamentiniñ malümatına köre, Qırım platforması beşinci parlament sammitini Büyük Britaniyanıñ eki parlament palatasınıñ vekilleri ve Ukrayina Yuqarı Radasınıñ reisi Ruslan Stefançuk teşkil eteler.
İştirakçiler Rusiyege qarşı sakntsiyalar, insan aqlarınıñ bozuluvı, telükesizlik meseleleri, Qırımnıñ Rusiye işğaliniñ iqtisadiy ve ekologik aqibetlerini muzakere etecekler.
Qırım platformasınıñ birinci parlament sammiti 2022 senesi Zagrebte (Hırvatistan), ekincisi – 2023 senesi Pragada (Çeh Cumhuriyeti), üçüncisi – 2024 senesi Rigada (Latviya), dördüncisi – 2025 senesi Stokgolmde (İsveçiya) oldı.