«LNR» aydutları tarafından tutulğan ukrainalılar dekabrniñ 29-nda saba Lugansktan deñişim yerine çıqarıldı.
Bu aqta TASS Rusiye haber agentligi aydutlarnıñ kontrolinde olğan sayt ve «LNR» vekili Olga Kobtsevanañ malümatına esaslanıp bildire, dep haber ete Azatlıq Radiosı.
Onıñ aytqanına köre, olar «Mayorsk» kesiş noqtasına keteler.
Tasdıqlanmağan malümatqa köre, deñişim Donetsk vilâyetiniñ Ğorlivka yanındaki «Mayorsk» keçiş noqtasında kerçekleştirilecek.
Al-azırda resmiy deñişim cedvelleri yoq.
Faqat Üç taraflı bağ gruppasınıñ gumanitar alt gruppasındaki Ukraina vekili Valeriya Lutkovskaya, «İlovaysk, Debaltsevodan soñ dört yıl devamında esirlikte olğan balalarnı niayet alıp olurmız», dep bildirgen edi.
Kyiv ise Ukrainada tahqiqat altında bulunğan onlarnen insannı teslim ete bile.
Rusiye qoltutqan «DNR» temsilcisi Darya Morozovanıñ dekabrniñ 25-nde bildirgenine köre, olar Ukrainağa 53 insannı berecekler. Onıñ aytqanına köre, Ukraina tarafı «DNR» aydutlarına 87 insannı bermege razı oldı. Bu malümat şimdilik tasdıqlanmadı.
Dekabrniñ 18-nde Ukraina telükesizlik hızmeti Azatlıq Radiosınıñ muracaatına cevap berip, umumen Donbasta Rusiye qoltutqan aydutlarnıñ esaretinde 250 insan buluna, dep bildirdi.
Dekabrniñ 23-nde Donbastaki zıddiyetni al etüv üç taraflı bağ gruppası «er kesni er keske» şeklinde deñişimni belgiledi.
Ukraina prezidenti Volodımır Zelenskıy tutulğan şahıslarnı deñişim dekabrniñ 29-nda olacaq, dep tasdıqladı.
Dekabrde Parijde «normand formatı» sammiti keçirildi – Frenkistan, Almaniya, Ukraina ve Rusiye liderleri körüşti. Taraflar, Kyiv ve Moskva «er kesni er keske» formulası boyunca şahıslarnı dekabrniñ 31-ne qadar deñişecek, dep añlaşqan edi.
