Litvaniya prezidenti Dalâ Gribauskayte ve Ukraina prezidenti Petro Poroşenko Azaq ve Qara deñizlerdeki istilâ sebebinden Rusiyege qarşı halqara sanktsiyalarnıñ kenişletilmesini talap ete.
«Rusiyeniñ Qara ve Azaq deñizlerindeki istilâiy areketlerini toqtatmaq içün halqara ortaqlarımıznı sert sanktsiyalar qullanıp, regionda areket serbestligini temin etmesine çağıramız», – dedi Poroşenko dekabrniñ 7-nde Kyivde Litvaniya prezidenti ile keçirgen matbuat konferentsiyasında.
Gribauskayte, Litvaniya Rusiyeniñ Qırım yalısında yapqanlarına qarşı narazılıq olaraq milliy sanktsiyalar kirsetkenini qayd etti.
O, bu sanktsiyalar Litvaniyada iqtisadiy ve diger faaliyetnen oğraşıp olamaycaq şahıslarğa tesir etecek, böylecek olar Ukraina gemilerine yapqan «ücümlerinden mesülietli olacaq», dedi.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen Ukraina deñizcilerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
