Litvaniya Ukraina toprağınıñ bir qısmınıñ Rusiye tarafından işğal etilüvini tanımaycaq ve bu topraqlarnı işğalden qurtarmaq içün areket etecek, dep bildirdi Litvaniya prezidenti Gitanas Nausėda Poloniya Seyminde Poloniya-Litvaniya devleti Anayasasınıñ 230 yılı munasebetinen çıqışta bulunıp, dep haber ete «Ukrinform».
«Rusiye silâlı quvetleriniñ Ukraina sıñırında seferberlik etmesi ve Moskva tarafından desteklengen qanunsız gruppalarnıñ Ukraina şarqında yapqan arbiy areketleri siyasiy tesirni areket ettirici olaraq arbiy kerginlik başlatılması ve basqını köstere. Qayd etmege isteyim ki, Litvaniya Qırımnıñ qanunsız ilhaqını bir vaqıt tanımaycaq ve Ukraina qısmınıñ işğalini toqtatmaq içün areket etecek», – dep bildirdi Nausėda.
O, «Ukrainanıñ kene keçmişke qaytmasına yol berilmemeli», dep qoştı.
Varşavada Poloniya-Litvaniya devleti Anayasasınıñ 230 yılı munasebetinen Ukraina, Poloniya, Litvaniya, Latviya ve Estoniya devlet yolbaşçılarınıñ prezident sammiti keçirile.
Poloniya-Litvaniya devletiniñ birinci Anayasası 1791 senesi mayısnıñ 3-nde Seym tarafından qabul etilgen edi. O, Avropada eñ eskilerden biri sayıla. Bu vesiqanıñ maddelerini qullanuv ıntıluvı yerli magnatlarnıñ tirenüvi ve Poloniya qırallığınıñ Rusiye ordusı tarafından 1792 senesi işğal etilüvi neticesinde muvaffaq olamadı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
