Litvaniyanıñ Ukraina elçisi Valdemaras Sarapinas Qırım ve Herson vilâyetiniñ memuriy sıñırını ziyaret etti, dep haber ete Ukraina prezidentiniñ Qırım Muhtar Cumhuriyetindeki temsilciligi.
Müessise malümatına köre, elçi Ukraina prezidentiniñ Qırım Muhtar Cumhuriyetindeki daimiy vekilinen beraber «Kalançak» ve «Çaplınka» kiriş-çıqış kontrol noqtalarını ziyaret etti.
Berilgen malümatqa köre, ziyaret programmasında Qırımdan köçip kelgen ve Herson vilâyetinde yaşağanlarnen ve qırımtatar halqınıñ vekillerinen körüşüv planlaştırıla.
Kanadanıñ Ukraina elçisi Qırım ve Herson vilâyetiniñ memuriy sıñırını ziyaret etti. Anda Büyük Britaniya elçisi de bardı.
Ukraina ombudsmeniniñ ofisi bildirgenine köre, Qırımnıñ memuriy sıñırında bir sıra eksiklik qayd etildi, «Çaplınkada» vaziyet «kritik».
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
