Qırımtatar siyasetçisi Nariman Celâl ve ağa-qardaş Asan ve Aziz Ahtemovlarnıñ maneviy alı yahşı, amma mahkemeniñ şikâyet arizasınen bağlı qararı olarnıñ tarafında olmaycağını añlaylar. Bu aqta Narimannıñ ömür arqadaşı Leviza Celâlova «Suspilne» izaatında ayttı.
«Nariman ve ağa-qardaş Ahtemovlarnıñ maneviy alı yahşı. Netice ne olacağını añlaymız, şikâyet qararı ne olacaq bilemiz, amma kene de qararlımız, kene de fikrimizni qoruycaqmız», – dep qayd etti o.
Celâlovanıñ malümatına köre, şikâyet arizası baqılmazdan bir qaç kün ögüne Nariman Celâlnıñ SİZOda tutuv şaraitlerinen bağlı şikâyetine cevap aldı. Oña töşekte oturmağa izin bermeyip, oñaytsız bir skemlede oturmağa aytalar. Neticede, qayd etkenine köre, Celâlovnıñ sırt ve ayaq problemleri başladı.
«Oña ilâc yolladım, amma alâ daa o ilâc Narimanğa berilmedi. Çoqça yürmege tırışa, çünki skemlede oturmaq qıyın ve oñaytsız. Sırtı ağıra ve eñ çoq 20 daqqa oturmağa mümkün. Şunıñ içün ayaqta olmağa mecbur. Ebet, 2 yıl devamında sağlığı fenalaştı», – dep tarif etti Celâlova.
Onıñ aytqanına köre, Celâl ve ağa-qardaş Ahtemovlar mahkeme qararı qabaatlayıcı olacağını añlaylar. «İrına Danılovıçnen olğanı kibi, belki, alları sebebinden bir aynı alıp taşlarlar. Nevbetteki adım – temyiz mahkemege şikâyet bermek».
Berilgen malümatqa köre, Aqmescitte Qırım garnizon mahkemesiniñ binası ögünde Rusiye uquq qoruyıcıları Celâl ve ağa-qardaş Ahtemovlarğa qoltutqan insanlarnı tuta. Tutulğanlar arasında «Qırım birdemliginiñ» eki jurnalisti bar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
