Rusiye Federatsiyası kontrolindeki Qırım Yuqarı mahkemesi bulunğan yeri 8 ay devamında belli olmağan 28 yaşında Canköy rayonınıñ sakini Lera Cemilovanı «devlet hainliginde» qabaatlap, 15 yıl umumiy rejim koloniyasında qalmasına üküm etti. Bu aqtaQırım aq qorçalayıcı gruppasıhaber ete.
«Avgustnıñ 20-nde işğalci Qırım «Yuqarı mahkemeniñ» qadısı Alla Hineviç Lera Cemilovanı «devlet hainligi» (Rusiye Federatsiyası Ceza kodeksiniñ 275-inci maddesi) davasında qabaatlı tanıp, 15 yıl umumiy rejim koloniyasında qalmasına üküm etti ve 100 biñ ruble para cezasını berdi ve azat etilgen soñ serbestligini bir buçuq yılğa sıñırladı», – dep aytıla haberde.
Fevral ayında ğayıp olğan qıznıñ anası Lenora Cemilova 2024 senesi mayıs ayında qızı Rusiye mirovoy mahkemesine ketirildi, dep tarif etti. Anda narkotikleri barmı dep kontrolini red etkeni sebebinden 15 kün memuriy apis qararı alınğan eken.
Soñra FSB hadimleri Leranıñ qardaşına apis müddeti bitken soñ onı yibermeyip, FSB idaresine alıp ketecekler, dep bildirdi. O vaqıttan berli tuvğanları qıznıñ bulunğan yerini ve uquqiy statusını bilmey edi.
Mart ayında Cemilovanıñ Aqmescitteki №1 SİZOda bulunğanı belli oldı.
