Qırımda noyabrniñ 21-nde Qırım Muhtar Cumhuriyeti Yuqarı Şurasınıñ sabıq deputatı («Qurultay-Ruh» deputatlar gruppası), Ukrainada nam qazanğan jurnalist, yazıcı Leonid Pilunskiy vefat etti, dep bildirdi oğlu Yaroslav Pilunskiy.
«Babam ketti. Şeñ olıp, ayatnıñ er kününe quvan, dep ayttı. Tuzlu yelnen büs-bütün siñirilgen şair. Aqlınen bütün dünyanı sarıp ala bile edi. Anda adalet tapıp, onıñ içün küreşe edi», – dep yazdı Facebookta Pilunskiyniñ oğlu.
Bundan evel o, babası COVID-19 ile küreşe, dep bildirgen edi.
Leonid Pilunskiy Rusiyeniñ Qırım işğaline qarşı çıqıp, 2014 senesinden soñ siyasetten çekildi ve yazıcılıq faaliyetine daa çoq diqqat ayırdı. Qırımda yaşamağa qaldı.
«Siyaset artıq keçmişte qaldı. 1990 senesinden berli içinde edim. Başta siyasiy jurnalistika edi, 5 yıl devamında Qırım Muhtar Cumhuriyeti Yuqarı Şurasınıñ toplaşuvlarını canlı yayınladım, soñki siyasetçilernen, tek Qırımdakilernen degil, tögerek masalar yapqan edim. Soñra ise kerçek siyaset başlandı: Ukraina Halq Areketiniñ Qırımdaki teşkilât reisi ve eki kere deputat. Men 100 deputattan minberden ukraince çıqış yapqan deputatlardan yekâne edim ve er vaqıt Ukrainağa qoltuttım. Amma bular endi yoq - öldi, 2014 senesiniñ fevralinen beraber yoq oldı. Qırımda açıq faaliyet yoq. Men olmağan şeyden çekildim», – dep aytqan edi o, 2015 senesi bergen intervyüsında.
Pilunskiy, Qırım.Aqiqatqa bergen intervyüsında «bütün yazılarnıñ esas mevzusı deñiz ola», dep tarif etken edi.
