Martnıñ 14-nde qırımtatar faali Lenur (Abdullah) Yakubovnıñ memuriy apis cezası bitti. O, Aqmescitteki tahqiqat izolâtorında tutuldı, dep haber ete «Qırım birdemligi».
«Qanunsız olğan bir apis cezası. Mahkeme qararınen razı degilim. Davada kerçek maqsadlar gizlengen. Advokat mahkemede fikrini ayttı. Şimdi istinaf mahkemesi olacaq, adaletni talap etecekmiz», – dedi Lenur Yakubov vaqtınca tutuv izolâtorından çıqıp.
Fevralniñ 29-nda saba Eski Qırımda ve Seyit Eli (Juravki) köyünde Rusiye uquq qoruyıcıları dört qırımtatarı Lenur Yakubov, İzet Sayfullin, İdris Yurdamov ve Şevket Kiyamovnıñ evlerinde tintüv keçirdi. Eski Qırım camisi de tintildi.
Tintüvlerden soñ Eski Qırımlı faal ve iş adamı Lenur Yakubov ve «Eski Qırım» mustaqil musulman cemiyetiniñ imamı İzet Sayfullin tutuldı. İdris Yurdamov ve Şevket Kiyamovnı uquq qoruyıcılar evlerinde qaldırdı. Olarğa qarşı memuriy protokollar tizilmedi.
Daa soñra Sayfullin polis bölüginden yiberildi. Oña qarşı «qanunsız missionerlik faaliyeti» içün memuriy protokol tizildi. Belli olğanına köre, Lenur Yakubovğa qarşı da memuriy protokol tizildi, onı 14 künge apiske alğanlar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
