Rusiye kontrolindeki Qırım Yuqarı mahkemesiniñ ATR qırımtatar telekanalınıñ saibi Lenur İslâmovnıñ davası boyunca oturışuvı vaqtında qadılar onıñ video muracaatını baqmağa razı olmadı. Advokat Nikolay Polozov bunı imaye aqqınıñ bozuluvı dep saya.
«Böylece, olar tek imaye aqqını bozmadı, müvekkilime oña qarşı cinaiy dava çerçivesinde söz almağa bermedi», – dep ayttı advokat Qırım.Aqiqat mühbirine.
Oturışuv vaqtında koloniyada bulunğan şaat Rustem İlyasov da videokonferentsiya bağı vastasınen sorğuğa çekildi.
«O, Lenur İslâmovnı tanımay, 2016 senesi Qırımdan çıqıp, anda arbiy baza, çadır, vagonçıq körgen edi, dep ayttı. Anda tanışını körip, laf etip ketti. Lenur İslâmovnı şahsen tanımay, amma onı pek yahşı ve Qırımda ürmet qazanğan namuslı bir insan olaraq bile», – dedi advokat.
Daa soñra Rusiye prokurorı Roman Lobov İlyasovnıñ evelki şaatlığını oqudı. Olarğa köre, Rustem İlyasov Qırımdan çıqıp, qırımtatar halqınıñ lideri Mustafa Cemilevnen körüşti ve iş tapmasında yardım istedi. Cemilev onı Lenur İslâmovğa «Noman Çelebicihan batalyonına» yolladı, anda Cemilevniñ aytqanına köre, İlyasov ayda 4-5 biñ ğrıvnâ alacaq. Rustem İlyasov böyle bir şey aytmağanını, protokol imzalamağanını ve oña qarşı cinaiy davada «işkence ve azap qullanıldı», dep qayd etti.
Zarar körgen «Qırım elektrik ağlarınıñ» vekili mahkemege bu teşkilâtnıñ elektrik ağ tayaqları olğanına dair vesiqa berdi. Amma 2015 senesi patlavdan zarar körgen elektrik naqil hatları teşkilâtqa ait degil.
Nevbetteki oturışuv 2020 senesi dekabrniñ 2-ne planlaştırıldı. Polozovnıñ fikirince, mahkeme tahqiqatı yekünlendi dep ilân etilecek ve taraflar munaqaşağa keçecek.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
İslâmovnıñ Qırım.Aqiqatqa bildirgenine köre, onıñ Rusiye kontrolindeki Qırım Yuqarı mahkemesiniñ oturışuvlarında iştirak etmege niyeti yoq. O, Qırımda oña qarşı esnasnı «sahte mahkeme» dep adlandırdı.
