Rusiyeniñ Krasnodar şeerinde umumiy yurisdiktsiya Dördünci temyiz mahkemesine ATR telekanalınıñ baş müdiri Lenur İslâmovğa qarşı çıqarılğan ükümnen bağlı şikâyet yollanıldı. Bu aqta advokat Nikolay Polozov Facebookta bildirdi.
«Tek bundan soñ Avropa insan aqları mahkemesine muracaat etmege imkân olacaq», – dep yazdı advokat.
Polozovnıñ aytqanına köre, aqımdaki seneniñ başından itibaren Avropa insan aqları mahkemesiniñ iş qaideleri deñişti.
«Artıq milliy yurisdiktsiya (bu vaziyette Rusiye) içinde imaye vastaları qalmağan soñ, eskisi kibi tek eki – birinci ve istinaf qurulışlardan degil, üçünci temyiz qurulışından da keçmek kerek», – dep qoştı advokat.
Polozovnıñ qayd etkenine köre, o, temyiz mahkemesi «davanı kerekli kibi baqar dep boş hayal qurmay».
2020 senesi dekabrniñ 10-nda Qırım Yuqarı mahkemesi İslâmovnı 19 yıl sert rejimli koloniyada qalmasına ğıyabiy şekilde üküm etti. O, qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv». Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
İslâmovnıñ Qırım.Aqiqatqa bildirgenine köre, o, Avropa insan aqları mahkemesine muracaat etecek.
2021 senesi aprel ayında Soçideki Üçünci umumiy yurisdiktsiya istinaf mahkemesi ATR telekanalınıñ baş müdiri Lenur İslâmovnıñ ükmüni 19 yıldan 18 yılğa deñiştirdi.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
