Rusiyeniñ Soçi üçünci İstinaf mahkemesi ATR telekanalınıñ baş müdiri Lenur İslâmovnıñ ükmüne qarşı istinaf şikâyeti boyunca mahkeme oturışınıñ kününi martnıñ 23-nden aprelniñ 28-ne deñiştirdi.
Bunı Qırım.Aqiqat mühbirine advokat Nikolay Polozov haber etti.
«Bugünki mahkeme oturışı keçirilmedi, çünki istinaf şikâyetine advokat bergen qoşma malümatnen er kes tanışmağa yetiştirmegen. Körüne ki, Rusiyeniñ Soçi üçünci İstinaf mahkemesi menim istinaf şiyaketimden o qadar tesirlendi ki, atta alâ daa ne cevap bereceklerini tapa bilemediler. Böyle bir üküm çıqarıp, ne qadar bozuvlar yapqanları köz ögüne alınsa, er şey bes-belli. Bu ilâvelerde, üküm 40 saifede tafsilâtlıca añlatılğan», – dedi Polozov.
Dekabrniñ 10-nda Qırım Yuqarı mahkemesi İslâmovnı 19 yıl sert rejimli koloniyada qalmasına ğıyabiy şekilde üküm etti. O, qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv». Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
İslâmovnıñ Qırım.Aqiqatqa bildirgenine köre, o, Avropa insan aqları mahkemesine muracaat etecek.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
