Rusiyeniñ Soçi üçünci İstinaf mahkemesi Rusiyeniñ nezaretinde olğan Qırımnıñ Yuqarı mahkemesinden materiallarnı ve ATR telekanalınıñ baş müdiri Lenur İslâmovnıñ ükmüne qarşı istinaf şikâyetlerni alğan. Mahkeme oturışı 2021 senesi martnıñ 23-nde saba saat 10-nda ötkerilecek, dep haber etti Qırım.Aqiqat mühbirine advokat Nikolay Polozov.
“İstinaf şikâyetine kelgende – üküm qanunsız olaraq çıqarılğanını, lâğu etilmek kerek olğanını ve bütün qabaatlavlarğa köre aqlama ükmüniñ çıqarılmasını talap etemiz. Bundan ğayrı meni prokuror Roman Lobovnıñ teklifinen tanıştırdılar. O, İslâmov RF Ceza Qanunnamesiniñ 280-nci maddesi ile mahküm olunmamalıdır, dep saya... çünki üküm çıqarılğanda bu madde qısmen cinayetten kenarlaştırılğan edi eken”, – dep qayd etti Polozov.
Advokatnıñ añlatqanına köre, prokuror 19 yıl sert apis cezasını qaldırıp, kütleviy haber vastaları ile işlemeknen bağlı sıñırlavlarnı lâğu etmege teklif etken.
Dekabrniñ 10-nda Qırım Yuqarı mahkemesi İslâmovnı 19 yıl sert rejimli koloniyada qalmasına ğıyabiy şekilde üküm etti. O, qabaatlavnıñ bütün noqtalarına istinaden qabaatlı tanıldı – «diversiyalarnı teşkil etüv, qanunsız silâlı birleşmeni quruv ve Rusiye topraq bütünliginiñ bozuluvına çağıruv». Qadılar, ükümde İslâmovnıñ kütleviy haber vastalarınıñ faaliyetinde 2 yıl iştirak etmesini yasaqladı ve 1 yılğa azatlığını sıñırladı.
İslâmovnıñ Qırım.Aqiqatqa bildirgenine köre, o, Avropa insan aqları mahkemesine muracaat etecek.
Rusiye FSBsi 2015 senesi oktâbr ayında Lenur İslâmovğa qarşı cinaiy dava açıp, onı federal qıdıruvğa ilân etti.
Rusiye akimiyeti İslâmovnı federal qanunğa zıt bir şekilde silâlı birleşme qurğanında (Rusiye Ceza kodeksiniñ 208-inci maddesiniñ 1-inci qısmı), diversiyalar yapıp, büyük mülk zararı ketirgeninde (Rusiye Ceza kodeksiniñ 281-inci maddesiniñ 2-nci qısmınıñ «a», «b» noqtaları), kütleviy haber vastaları üzerinden Rusiye topraq bütünligini bozmağa çağırğanında (Rusiye Ceza kodeksiniñ 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı, 280.1 maddesiniñ 2-nci qısmı) qabaatladı.
