Dekabrniñ 4-nde saba tintüvden soñ tutulğan ve Rusiye uquq qoruyıcıları tarafından Sudaqtan Aqmescitke alıp ketirilgen qırımlı jurnalist Lenora Dülber "subet keçirilgen" soñ yiberildi.
Bu aqta Qırımtatar Milliy Meclisiniñ reisi Refat Çubarov ve "Qırım birdemligi" cemaat birleşmesi bildirdiler.
"Saba evinde keçirilgen tintüvden soñ Rusiye cezalayıcıları tarafından "Qırım ve Aqyar şeeri Rusiye FSB idaresine" çıqarılğan Lenora Dülber yiberildi, ve şimdi evine, Sudaqqa kete", – dep yazdı Çubarov.
Rusiye uquq qoruyıcıları Dülbernen ne mevzuda laf etti ve ne sebepten onı tuttı aytılmay. Rusiye uquq qoruyıcı müessiseleri şimdilik vaziyetni resmiy şekilde izaatlamadı.
Dekabrniñ 4-nde saba Sudaqta Rusiye uquq qoruyıcıları qırımlı jurnalist ve siyasetşınas Lenora Dülberniñ evinde tintüv keçirgen soñ onı Aqmescitke alıp ketti. Qırımlı aq qorçalayıcı Lutfiye Zudiyevanıñ malümatına köre, tintüv Rusiye kontrolindeki Aqmescitniñ Kiyev rayon mahkemesiniñ qararınen keçirildi.
"Qırım birdemligi" haber etkenine köre, tahminen 20 silâlı insan iştirak etken tintüv vaqtında Rusiye uquq qoruyıcılarınıñ diqqatını Lenora Dülberniñ ilmiy işleri celp etti. Olar cep telefonını ve bilgisayarını da aldı.
Lenora Dülber – siyasetşınas, içtimaiyatçı, jurnalist ve qırımtatar faali. "Merkez" yayınınıñ alıp barıcısı, "Siyasiy saadaki transformatsiya şaraitlerinde qırımtatarlar" içtimaiy tedqiqatınıñ müelliflerinden biri ola.
