Ukrayina 49 ukrayinalını Rusiye esirliginden qurtardı. Aralarında Rusiye casuslıqta qabaatlağan Leniye Umerova bar. Bu aqta memleketniñ prezidenti Volodımır Zelenskıy bildirdi.
Ukrayina Silâlı quvetleri, Milliy gvardiya, Milliy polis, Devlet sıñır hızmetiniñ arbiyleri ve vatandaşlar evge qayttı.
«Azovstal» imayecileriniñ bir qısmı da azat etildi, dep bildirdi Zelenskıy.
«Esir ve reinelerni Rusiye apsinden qurtarmaq içün çalışqan taqımımızğa teşekkürler bildirem. Devletimiz içün deñişüv fondunı temin etken er bir Ukrayina bölügini ayrıca qayd etmege isteyim. Rusiye işğalcilerini esir alğan bütün arbiylerimiz, Rusiye diversantları ve işbirlikçilerini tesirsiz alğa ketirgen bütün hızmetlerimiz insanlarımıznıñ azatlıqqa çıqmasını yaqınlaştıra. Er kes – em arbiy, em vatandaşlar evlerine qaytmalı», – dep yazdı Ukrayina prezidenti.
Leniyeniñ ağası Aziz «Suspilne.Krım» içün izaat berip, qız qardaşını ekimlerge köstermek içün alıp keteler, soñra ise tuvğanlarınen körüşip olur, dep bildirdi.
«Telefon etip, azatlıqta olğanını bildirdi. Şimdi ekimlerge alıp keteler, soñra körüşip olurmız. Ana-babamıznen laf ettim, inanıp olamaylar!», – dedi o.
2022 senesi dekabr ayında 25 yaşındaki Leniye Umerova Kıyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Üç aydan soñ onı yibergenler, lâkin birden Leniyeni polis patruli vesiqaları olmağanı içün tuttı, dep tarif ete ağası. Rusiye mahkemesi onı 15 künge apiske aldı. Soñra Leniyege qarşı daa eki protokol tizildi.
2023 senesi mayısnıñ 5-nde Moskvanıñ Lefortovo mahkemesi Umerovanı casuslıqta qabaatlap apiske aldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
