Rusiye casuslıqta qabaatlağan qırımtatarı, Ukrayına vatandaşı Leniye Umerova Rusiye apsinden yañı mektüp yazdı. Onı ağası Aziz Umerov derc etti.
Onıñ aytqanına köre, soñki vaqıtları haberler az edi, «mektüplerni tsenzorlar toqtatıp başladı».
«Kamerada bir özüm. Eski qomşumnı alğanlar, yañısı daa kelmedi. SİZO esasen erkekler içün, belki de, ketirmezler. Amma bir özüm daa raatım, endi alıştım. Kütüphanede kitaplar aldım, çeşit şeyler ögrenem. Soñki vaqıtları haberlerni az baqam…», – dep aytıla mektüpte.
Umerovanıñ aytqanına köre, o, kamerada futbol baqa, lâkin az añlay, dep qayd ete. «Vaqtım çoq, özüm çezerim».
«Ara-ara BRİKS oyunlarını köstereler, bugün baqtım. Anda daa az añlayım, şunıñ içün sponsor reklamasını baqtım. Meraqlı, halqara oyunlar, amma tek Rusiye reklaması bar», – dep yaza Leniye.
«Siznen körüşmege, beraber kezmege ister edim, dep hayal ettim. Lezetli qave içip, Milkbarğa trayfl almağa kirer edik, nevbette ise çullu bir köpeçiknen tanışır edim… Sizni pek sağındım. Amma bu tek qıyınlıqlar. Olar bizni degil, biz olarnı yeñermiz! Ğalebe qazanırmız! Keçermiz! Beraber!».
2022 senesi dekabr ayında 25 yaşındaki Leniye Umerova Kıyivden Qırımğa ketmege mecbur edi, çünki babasınıñ qanseri bar. Rusiye sıñırcıları Leniye Umerovanı Gürcistan-Rusiye sıñırından keçken soñ rejim alanı qaidelerini bozğanı sebebinden tuttı.
Üç aydan soñ onı yibergenler, lâkin birden Leniyeni polis patruli vesiqaları olmağanı içün tuttı, dep tarif ete ağası. Rusiye mahkemesi onı 15 künge apiske aldı. Soñra Leniyege qarşı daa eki protokol tizildi.
2023 senesi mayısnıñ 5-nde Moskvanıñ Lefortovo mahkemesi Umerovanı casuslıqta qabaatlap apiske aldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
