Rusiye Federatsiyası Leningrad vilâyetindeki Leningrad vilâyetiniñ valisi Aleksandr Drozdenko aprelniñ ekisinden üçüne keçer gecesi regionda uçucısızlarnıñ ücümi aqqında haber etti.
Onıñ aytqanına köre, ava mudafaasınıñ quvetleri yedi ukrayin dronını tüşürdi. Vsevolod rayonında "parçalarnıñ tüşkeni" qayd etildi. Morozov adına qasabada sanayı alanında qullanılmağan binanıñ damı zarar kördi. Eki kişi yaralandı.
Morozov qasabasında patlayıcı madde ve silâ parçaları, şu cümleden "Topol-M" kompleksleriniñ raketalarında qullanılğan qattı yaqarlıq yapılğan Morozov zavodı yerleşe. Müessise "Rosteh" erkânına kire, Rusiyeniñ Ukrayinağa qarşı büyük cenki başlağan soñ ABD, AB, Büyük Britaniya, Kanada, İsviçre, Yaponiya ve Ukrayina onı sanktsiyalar cedveline kirsetti.
Rusiye Mudafaa nazirligi bir gecede tüşürilgen 192 ukrayin uçucısızı aqqında esabat berdi.
Rusiyeniñ büyük istilâsı başlağan soñ Rusiyedeki çeşit obyektler avadan ücümge oğray. Eñ sıq 2024 ve 2025 seneleri ücüm nişanı cermay zavodları ola. Ukrayinanıñ işğal etilgen topraqlarında da Rusiye obyektleri ücümge oğray.
Ukrayina Silâlı quvetleriniñ Baş ştabı ücümlerniñ büyük qısmını tasdıqlap, Ukrayina Mudafaa quvetleri "Rusiye işğalci ordusınıñ cenk imkânlarını eksiltecek ve Rusiyeni Ukrayinağa qarşı silâlı istilâsını toqtatmasına mecbur etecek tedbirlerni muntazam sürette yapa", dep bildirgen edi.