Aqmescit rayonınıñ Rusiye prokuraturası qırımtatar faali Lemmar Yunusovnı «ekstremist faaliyeti ile küreş qanunlarınıñ bozuluvı qabul etilmeycegine» dair tenbiledi, dep haber ete Qırım.Aqiqat mühbiri.
Onıñ malümatına köre, prokuratura Yunusovğa Noman Çelebicihannıñ ölüm künü ve Qırım işğaline qarşı tirenüv kününe bağışlanğan «ekstremist aktsiyalarnıñ teşebbüsçilerinden biri olğanına dair malümatları bar», dep haber etti. Vesiqa Rusiye prokurorı Sergey Zaytsev tarafından imzalandı.
Hatırlatamız, Ukraina prezidenti Volodımır Zelenskıy 2020 senesi çıqarğan buyruğınen fevralniñ 26-nı Rusiyeniñ Qırım işğaline qarşı tirenüv künü olaraq ilân etti.
Qırımnıñ Rusiye işğaline qarşı tirenüv künü
Fevralniñ 26-nda cemaatçılıqnen teşebbüsinen Qırımnıñ Rusiye tarafından işğal etilüvine qarşı tirenüv künü qayd etile. Ukraina ve bütün dünyada qırımlılarğa ve memleketniñ topraq bütünligine qoltutuv aktsiyaları, munaqaşa, forum, miting ve yürüşler keçirile.
2014 senesi fevralniñ 26-nda Qırım Muhtar Cumhuriyeti Yuqarı Şurasınıñ binası ögünde Ukraina topraq bütünligine qoltutuv mitingi olıp keçti. Miting iştirakçilerine qarşı Rusiye tarafdarları, hususan «Rus birligi» firqası çıqtı.
2020 senesi yanvar ayında aralarında Ahtem Çiygoz ve Rustem Umerov olğan Ukraina Yuqarı Radasınıñ deputatları Ukraina prezidenti Volodımır Zelenskıyge muracaat etip, Qırımnıñ Rusiye işğaline qarşı tirenüv kününi devlet seviyesinde resmiy şekilde pekitmege rica etti.
