Lehistan şimalinde Koşalin şeerinde katolik papazlar, küfür sayğan kitaplarnı halq ögünde yaqtı, kitaplarnıñ arasında Coan Roulingniñ tılsımcı oğlançıq Harry Potter aqqında romanları da oldı.
Balalarnıñ yanında kitaplar yaqılğanınıñ süretleri Facebookta “Kökten SMS” fondunıñ saifesinde derc etilgen. Yaqmaqqa bağışlanğan yazıda, Bibliya ırımğa qarşı çıqqanı bildirile ve Muqaddes Kitaptan bazı alınmalar misal olaraq ketirile, dep bildire Azatlıq Radiosınıñ rus bolügi.
Amma tefsircilerniñ episi papazlarnıñ areketlerinen razı degil, Harry Potter içün kimse cinayet yapmağanı yazıldı ve 1930-ıncı seneleri Almaniyada natsistler kitap yaqqanı hatırlandı.
“Kökten SMS” fondu, Bibliya ve başqa hristian kitaplarıdan alınmalarnı SMS ile yollap, olarnı adamlarğa tanıtmağa tırışa.
