Poloniyanıñ sabıq prezident, Nobel sulh mukâfatınıñ laureatı Leh Valensa, Kremlniñ Qırımnı ilhaq etmek içün qullanğan usulları eskirgenini ve Rusiye yutquzacağını bildirdi. Bunı o BBS-niñ rus hızmetine intervyü vaqtında ayttı.
«Bütün sıñırlar, bütün küç çezüvler bizim devrimiz içün kelişmey, şunıñ içün o zaman yahşı olğan usullar bugün endi yaramay. Bugün başqa usullar kerek, başqa areket tarzı. Buña köre de, Rusiyeniñ Qırım ve umumen Ukraina ile yapqanları şimdiki devirge uyğun olmağan usullardır. Olar yutquzmaq kerekler ve yutquzacaqlar, yalıñız bu zaman ve artıq belli olğan şey içün ödenilgen qıymet meselesidir. Bazıları içün bu açıq-aydın körüne ve olar farqlı davranmaq ister ediler, digerleri içün ise alâ daa yoq, adamlar alâ daa eski usullarnı qullanalar», – dedi o.
Leh Valensa 1990-1995 seneleri Poloniya prezidenti edi. Bundan evel, o, "Birdemlik" zenaat birliginiñ lideri edi. 1983 senesi o Nobel sulh mukâfatını aldı.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
