Poloniyanıñ sabıq devlet başı Leh Valensa Rusiyeniñ telükesi qarşısında Ukrainanı mudafaa etmege azır olğanını bildirdi.
"Birdemlik köstermek ve mudafaa etmek maqsadınen deral Kyivge ketmege azır olğanımnı bildirem", - dep yazdı Valensa Facebook saifesinde.
Bundan ğayrı bunıñ içün ilk adımlar da yapqan, şu cümleden niyetini Ukrainanıñ Poloniyadaki elçisine bildirgen.
Bıltır küzde kütleviy haber vastalarında istihbaratnıñ Ukraina sıñırında Rusiye ordusı toplaşqanına dair malümatı peyda olıp başladı. ABD ve diger Ğarp memleketleri Moskva arbiy istilâğa azırlana, dep tahmin ettiler. Kreml bunı inkâr etip, ABD ve NATOdan telükesizlik kefaletlerini talap etti – hususan NATOnı şarqqa kenişletmemek. Ğarp vekilleri printsipial meselelerde uzlaşuv olmaycaq, dep bilrdirgen edi.
