Brüssel «Rusiye iqtisadiyatınıñ hassas sektorları içün telüke yaratqan» sanktsiyalarnı kirsetse, Moskva Avropa Birligi ile olğan munasebetlerini kese bile, dep bildirdi Rusiye Tış işler naziri Sergey Lavrov «Solovyev LIVE» YouTube kanalınıñ yayınında. Qonuşması müessise saytında derc etildi, dep haber ete «Nastoyaşçeye Vremâ».
«[Avropa Birligi ile munasebetlerni kesmege] azır olğanımızğa esaslanamız. Endi olğanı kibi, iqtisadiyatımız, hususan eñ hassas saaları içün telüke yaratqan belli sanktsiyalar kirsetilgenini daa bir kere körsek. Dünya ayatından izolâtsiya olmağa istemeymiz, amma buña azır olmalımız. Barışıq isteseñ – cenkke azır ol», – dedi Lavrov.
Bloomberd menbalarına esaslanıp haber etkenine köre, Avropa Birligi Rusiye muhalifetçisi Aleksey Navalnıynıñ vaziyeti sebebinden sanktsiyalar azırlap başladı. Agentlik malümatına köre, Avropa Birliginiñ elçileri fevralniñ 10-nda tedbirlerni muzakere etti, aza memleketlerden iç birisi qarşı çıqmadı.
Fevralniñ başında Moskvağa Avropa Birliginiñ tış işler vekili Josep Borrell Moskvağa kelip ketti. Onıñ Lavrov ile yapqan körüşüvinde Tış işler nazirligi Aleksey Navalnıyge qol tutuv narazılıq aktsiyalarında iştirak etkeninde qabaatlanğan üç Avropa diplomatı quvulğanı aqqında ilân etti. Lavrovnen körüşken Josep Borrell Avropa ve Rusiye «bir-birinden uzaqlaşalar», dep bildirdi.
Rusiye Tış işler naziri, Ğarp öz buhranlarına diqqat celp etmemek içün Aleksey Navalnıynıñ zeerlenüv ikâyesini qullana, dep bildirdi. Rusiye Tış işler nazirliginiñ fikirince, memlekette olıp keçken soñki narazılıq aktsiyaları çetelden planlaştırıldı.
