Rusiye Tış işler naziri Sergey Lavrovnıñ bildirgenine köre, Avropa Şurasınıñ baş kâtibi Mariya Peyçinoviç-Buriç ile keçirgen muzakerelerde işğal etilgen Qırımnıñ suv vaziyetini muzakere etti. Bu aqta TASS Rusiye haber agentligi bildirdi.
«Bütün Avropa, universal şartnamelerge ve Qırımnı ziyaret etken ve maruza azırlağan Avropa Şurası baş kâtibiniñ mahsus vekili Ştudman tarafından berilgen tevsiyelerge zıt bir şekilde Qırımnıñ suv qamaçavı etrafındaki vaziyet qabul etilemez, dep qayd ettik. Tevsiyelerinden biri Qırımnı suvnen temin etüv problemine acele cevap bermek edi», – dedi Lavrov bazarertesi künü Avropa Şurası baş kâtibi ile muzakere neticelerinen bağlı matbuat konferentsiyasında.
Avropa Şurasınıñ baş kâtibi bu beyanatqa daa cevap bermedi.
BM Ukraina monitoring missiyası, Qırım yarımadasınıñ işğaline baqılsa, «Rusiye Qırımda qorçalanğan insanlarnı suvnen temin etüvden mesüliyetli ola», dep israr ete.
Aqmescitte, Bağçasaray ve Aqmescit rayonlarında qurğaqlıq ve suv azaluvı sebebinden üçünci eñ sert suv berüv sıñırlarını kirsetkenler. Aqmescit akimiyeti suv berüv cedveline riayet etilmeycek, dep tenbiledi.
Qırımnıñ Rusiye ükümeti bildirgenine köre, yarımadanıñ suv teminatı ile «eñ yaramay stsenariyge» azırlanalar. Kreml kontrolindeki Qırım yolbaşçısı Sergey Aksenovnıñ bildirgenine köre, Rusiye Qırımnıñ suv teminatı vaziyeti fevqulâde olğanını tanıy. O, 2020 senesi 150 yıl içinde eñ quru oldı, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
