Rusiye Tış işler naziri Sergey Lavrov Rusiye prezidenti Vladimir Putinniñ Türkiye prezidenti Recep Tayyip Erdoğan ile körüşüvini ilân etti. Bunı Rusiye Tış işler nazirliginiñ yolbaşçısı Moskvadaki matbuat konferentsiyasında bildirdi.
Lavrovnıñ aytqanına köre, Putinniñ Erdoğan ile körüşüviniñ esas mevzusı «Suriyeniñ İdlibinen bağlı añlaşmağa riayet etüv» olacaqtır.
Lavrov planlaştırılğan körüşüvniñ tam kününi aydınlatmadı.
Türkiye Cumhuriyeti prezidentiniñ saytında Rusiye prezidenti ile olacaq körüşüv aqqında bir malümat şimdilik yoq.
Ukraina prezidenti Petro Poroşenko yanvarniñ 5-nde İstanbulda Türkiye prezidenti Recep Tayyip Erdoğan ile körüşip, Rusiye apishanelerinde tutulğan ukrainalı siyasiy mabüslerniñ azat etilüvini, işğal etilgen Qırımda insan aqları bozulğanını muzakere etti.
ABD prezidenti Donald Trump Suriyede olğan bütün ABD askerlerini andan çıqaracağını ilân etken soñ, Türkiye Suriye ile sıñırlarınıñ eki tarafından da askerlerniñ sayısını arttırdı.
Bu adım Türkiye prezidenti Recep Tayyip Erdoğannıñ dekabrniñ 23-nde Trump ile kerçekleştirgen telefon subetinden soñ atıldı. Eki lider ABD memleketten çıqqan soñ küç vakuumı olmasın dep, arbiy ve diplomatik koordinatsiya aqqında añlaştı.
