Rusiye Tış işler naziri Sergey Lavrov Moskvağa iş ziyaretinen kelgen Avropa Şurası Parlament assambleyasınıñ (PACE) reisi Hendrik Dams ile körüşip, Qırımnıñ suv problemini qayd etti.
Bu aqta Rusiye Tış işler nazirliginiñ matbuat hızmeti haber ete.
Müessise haberine köre, Lavrov Qırımdaki suv qıtlığı meselesini «suv qamaçavı» dep adlandırdı.
«Qırımnıñ suv qamaçavı problemi gumanitar cinayet ve yarımada ealisini cezalandıruv olaraq qayd etildi», – dep qayd etile Rusiye Tış işler nazirliginiñ haberinde.
2020 senesi oktâbrniñ 19-nda Lavrov Avropa Şurasınıñ baş kâtibi Marija Pejčinović Burić ile işğal etilgen Qırımnıñ suv meselesini muzakere etken edi. O, «bütün şartnamelerge zıt şekilde Qırımnıñ suv qamaçavı qabul etilemez», dep qayd etti.
Bundan soñ Ukraina Tış işler nazirligi, Rusiye reberliginiñ Avropa, Ğarp teşkilâtlarınen işğal etilgen Qırımdaki vaziyetnen bağlı subetleri yarımadanıñ uquqiy statusını deñiştirip olamaz, dep qayd etken edi.
BM Ukraina monitoring missiyası, Qırım yarımadasınıñ işğali sebebinden «Rusiye Qırımda insanlarnıñ suv imkânlarından esas mesüliyetni taşıy», dep israr ete.
Rusiye prezidentiniñ matbuat kâtibi Dmitriy Peskov, Rusiye işğal etilgen Qırımnı Ukrainasız suvnen temin ete bile, dep bildirgen edi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
