Halqara bala qoruv künü munasebetinen Latviyada Rusiye işğal etken yarımadada yaşağan qırımtatar faalleriniñ balalarına bağışlanğan aktsiya ötkerildi.
Bu aqta Ukrainanıñ Latviya elçihanesi saytında haber etile.
Haberde qayd etilgenine köre, aktsiyada Latviyadaki yaş ukrain plastçıları iştirak etti. Olar kâğıttan barışıq gögercinlerini yapıp, latış, ukrain ve qırımtatar halqlarınıñ birdemlik timsali olaraq 2019 senesi aprelniñ 24-nde Riganıñ Kronvald merkeziy parkında oturtılğan «Qırım yükesi» terekleriniñ dallarına bağladı.
Gögercinlerniñ bir qısmı resim ve muracaat mektüplerinen beraber elçihane tarafından Qırımtatar Milliy Meclisiniñ reisi Refat Çubarovnıñ yardımınen qırımtatar balalarına berilecek.
Aktsiya vaqtında elçihane vekilleri Rusiye akimiyetiniñ qırımtatarlarnı taqip etilüvini takbih etip, halqara uquq bozulğanını qayd etti.
