Ukrainanıñ Latviya nazirligi narazılıq bildirgen soñ Rusiyeniñ Daugavpils şeerindeki baş konsullığı Qırım ilhaqınıñ beşinci yılına azırlağan sergi qapatılğan edi. Bu aqta «Ukrinform» agentligi Ukrainanıñ Riga elçihanesi bergen malümatqa esaslanıp bildire.
«Ukraina elçihanesi Latviya Tış işler nazirligine Rusiye Federatsiyasınıñ Daugavpils Baş konsullığı teşkil etken provokatsion serginiñ keçirilmesi vaziyetinen bağlı obyektiv qıymet kesüv ve operativ qarar sebebinden teşekkürler bildire. Daugavpils sakinlerine Qırımdaki adise-vaqialar aqqında yañlış malümat bergen propaganda sergisiniñ qapatılması Kremlniñ yapqanlarına baqmadan Latviyanıñ Qırım ilhaqını tanımama meselesinde siyaset deñişmegenini daa bir kere isbatlay», – dep aytıla haberde.
Ukrainanıñ Latviya elçihanesi bu vaqianı Rusiyeniñ Qırım ilhaqını aqlamaq içün yapılğan daa bir propaganda tedbiri olaraq tanığanını bildirdi, «çünki sergide ukrain yarımadasındaki adise-vaqialarnen bağlı bir sıra yalan ve bütün dünyada cinayet olaraq tanılğan adise-vaqialar aqqında Rusiye baqışlarını aşlamaq ıntıluvı ola».
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
