Latviyanıñ Mudafaa nazirligi Rusiye sıñırında qoşma mobil ava mudafaa gruppaları yerleştirildi, dep haber etti. İdareniñ yolbaşçısı Andris Sprudsnıñ aytqanına köre, sıñırda uçucısızlarnı tapmaq içün mahsus radarlar da yerleştirilgen.
Latviya şarqiy sıñırlarınıñ ava mudafaasını sentâbrniñ 7-nde cumhuriyetniñ Rezekne vilâyetinde Rusiye dronı tüşken soñ pekitmege başladı. Soñra Latviya milliy silâlı küçleri dron memleketke Beyazrusiyeden uçıp keldi, dep bildirdi. Akimiyet bunı doğrudan-doğru istilâ dep saymadı, çünki dronnıñ nişanı, olarnıñ aytqanlarına köre, Latviya degil edi.
Rusiyeniñ Ukrayinağa ücümi başlanğan soñ Latviya ve diger Baltika memleketleri öz şarqiy sıñırlarını pekitmege başladılar. Sıñırlarda qoralar, qoşma pekitüvler, tankqa qarşı arıqlar qurula, cenk silâları ve mayın anbarları yapıla.
Memleketlerniñ qorqusını yaqın vaqıtta Rusiye NATO memleketlerinden birine ücüm etmege azırlanğanına işanğan talilciler arttıra. ISW ekspertleriniñ aytqanlarına köre, Moskva üç-beş yıldan soñ NATO memleketlerine ücüm etmege azır olacaq, bu ise talilcilerniñ tahminlerinden daa tezdir.
Rusiyeniñ Ukrayinağa qarşı büyük ücümi Avropanıñ bir çoq memleketinde arbiy masraflarnıñ keskin artmasına sebep oldı. Stokgolm halqara tınçlıq tedqiqatlar institutınıñ malümatlarına köre, Baltika memleketleri eñ çoq mudafaa masraflarını fayızler ceetinden arttırdı. Para ceetinden Litvaniya, Estoniya ve Latviyanıñ mudafaa masrafları bugün 1,8 milliard, 1 milliard ve 970 million euronı teşkil ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
